|
Bølifossen i Mørkridsdalen |
|
|
Bølifossen og området rundt er heilt spesielt. Når du startar fotturen frå parkeringsplassen på Hødnevollen og tek til venstre der stien deler seg ved Storatjødni og går vidare til Bølifossen, vil du oppleve ein overveldande variasjon i landskap og flora. Det tek ca 1 time å gå til denne fossen frå parkeringsplassen og du vil på turen gå forbi jettegryter, buldrande juv, store almestyvingar og bregneskogar. Frå Storatjødni, gjennom den trolske steinuri med urskog kan du i tillegg vere heldig å treffe på huldra med halen mellom beina. Etter du har passert Uri vil Knivabakkgjerdet og Bølifossen kome som ei openbaring.
Mørkridselva sig her roleg forbi og har ein pustepause på si travle ferd nedover dalen. Her er alt stille og du høyrer så vidt bruset av Bølifossen, som er omlag 1 km lengre oppe. På andre sida av elva ser du Knivabakkgjerdet med to gamle løer frå 1700 talet.
Knivabakkgjerdet var slåttemark til to småbruk på Mørkrid til heilt til byrjinga av 1970-talet. Dette var det beste slåtteteigane dei hadde og foret lagra dei i dei to løenene som står her enno (som er prega av forfall). Om vinteren frakta dei høyet med hest og slede ned til Mørkrid. Arne J. Mørkrid fortalde at det meste av jobben under transporten gjekk med til moking av snøskreder omtrent heile vegen frå Hødnevolen til Storatjødni.
Det var alltid folksomt på dette store gjerdet då det var slått, og segnet fortel at ein gong vil det skje ei ulukke her. Knivabakkgjelet (fjellet ovanfor) har nokre sprekker, og ein gong vil fjellet rase ut her. Når det skjer skal det vere 7 personar nede på slåttemarka. La oss håpe at dette ikkje vil skje, og at budeia som spådde dette i kaffigruddet ikkje har rett denne gongen.
Nokre hundre meter langs elva og stien møter vi på hengebrua, som fører deg heilt trygt over Mørkridselva, og no er det berre å spasere gjennom oreskogen bort til sandbankane ved Bølifossen.
|
På denne idylliske staden er det også populært å setje opp telt, men du skal ha gode nervar for å overnatte her åleine. Det har skjedd at personar har pakka teltet sitt midt på natta og lagt på sprang, etter å ha sett og høyrt ting her som me ikkje forbind med det daglege. Dette høyrer heldigvis med til det meir sjeldne, så dei fleste får seg ein god søvn her.
Eit ikkje uvanleg syn, og som du kan oppleve om morgonen når du ser ut av teltet, er hjortar som er nede til elva for å drikke.
Under fossen er det ein stor og svært djup høl som inneheld mykje fjellaure. Størrelsen er bra og i dei siste åra har det vorte landa fisk her over kiloen. Fiskestong er absolutt noko å ta med hit, og gjerne med ein boks meitemark, eit par spinnarar og slukar ekstra. Bunnforholda og straumane i hølen er lumske, så det kan vere greit å ha med seg litt reserveutstyr.
Dersom du går til den nedlagte stølen Knivabakkli (omlag 30 minutt frå her framover dalen), finn du òg godt fiske. Fiskehølen heiter Tudnia og det kjem av at vatnet går i "tudn" dvs. i ring. Endå litt lengre framme kjem du til ein anna foss som heiter Dulsetefossen (bilete nede til høgre), men adkomsten til den er best på andre sida av elva.
Bilete nede til venstre viser Kakkasgjelsfossen, som du går forbi etter ca 10 minutt gange frå parkeringsplassen ved Hødnevollen.
Skjolden Rafting arrangerer guida turar hit der det er mogeleg å fiske eller berre sjå den flotte naturen. Les meir på Skjolden Rafting sine sider her. |
|
|
Last Updated ( tysdag , 01 april 2008 )
|
)
)
)
)
)
